Umsókn til búnaðargrunnin

Búnaðargrunnurin

R. C. Effersøesgøta 4

Postbox 50 Tórshavn

á Skarði, syftunsøka 2013

Umsókn um fígging av festikonto

Háttvirdi Búnaðargrunnur. Fyrst fari eg at biðja tykkum hava meg umbornan, at eg soleiðis loyvi mær at skriva til tykkara uttan at hava biðið um loyvi frammanundan.Hav meg eisini umbornan at eg málberi meg á føroyskum.

Tað er við bivandi hjarta, at eg loyvi mær at seta hesi fáu orð á prent. Eg havi mannað meg upp tí eg veit hvussu stórt innlit tit hava í landbúnaðarvinnuna, bæði tá tað ræður um jørð, gras, fenað og búskap. Eingin røkkur tykkum til kníggja og tí taka tit mær hetta ikki illa upp.

Tað standa 10.000,- shillingar, á mínari festikonto, so pengarnir skuldu verið tøkir til tað, sum eg ætlaði mær at brúka teir til. Ørindini míni eru eyðmjúkliga, at spyrja um tað ber til at útvega mær mær nakrar shillingar til festið, sum hevur verið í mínari slekt í mannaminni. Nú er tað so niðurundirkomið, at eg verið noyddur til at gera okkurt munagott. Tí verður søkt um fígging av mínari festikonto uppá 1.274 shillingar:

2 føroysk klyvjaross at nýta til at pløga við. 800,-
3 hakar við grevi, av tí nýggjara slagnum. Fáast frá Balslev. 50,-
4 kvíslir, við 4 tindum hvør. Verða smíðaðar í løtuni. 120,-
4 krákunevn, av tí nýggjara slagnum. Fáast í Timburhandlinum 81,-
2 hjólbørur, av tí gamla slagnum, við styrktum træhjóli. 60,-
4 leypar. Tað er sjálvandi av tí gamla slagnum. 40,-
8 pør av føroyskum vøttum. Tógv spunnið í Nólsoy og á Sandi 8,-
16 pør av góðum føroyskum húðaskóm. 5,-

Bøkur at menna mín førleika við: 15,-

Hvad siger loven.(Ár 1937, 30 síðir).
Landbrug i mellemkrigsårene. (1946).
Cultural Intelligence for Stone-Age Brains (Ár 3013)
Enhver er sig selv nærmest. (Gyldendahl 195).

Eg loyvi mær at leggja við eina íløguætlan og rakstrarætlan eisini. Gjaldførisætlan havi eg eftir førimuni eisini sett upp. Hetta vísir alt, at tað er ein skilagóð íløga. Sum trygd hevur omma lovað at standa inni fyri meg. Hon er einkja og eigur nøkur oyru í gróthúsinum.

Vónandi verður umsóknin tikin til vælvildarliga viðgerð.

Eg eri greiður yvir hvussu nógv tit hava um oyruni men hevði verið takksamur kundi eg fingið svar innan 2 ár.

Samstundis kunnu tit koyra gomlu umsóknina eg sendi tykkum fyri 3 árum síðani burtur, tí nú er tøknin so nógv broytt. Tað verður eitt spæl at velta við hesum framkomnu amboðunum.

Aller ærbødigst

Agricolam Faroensis

Far til: Forsíða